ثلاث قضايا يطرحها الشبح : خاذوق مرزوق وملاعيب شيحه ( ممدوح طه ) وامبراطورية فؤاد أباظة

عليا النعمه لعيب ولعيب جامد كمان مش قلت لكم اللى يعيش مع ست محافظين ولا يتهزش وكلهم يمشوا وهوه على حجر المحافظة يبقى ممدوح طه اللعيب أوى

.فاكرين طبعا الحريق اللى تم فى الوحدة المحلية بشيبه بعد حكم الاخوان ماخلصنا منه ؟ طبعا ممدوح طه رئيس مركز ومدينة والموظف بتاع التراخيص كان بيطلع تراخيص بالمخالفة والناس تدفع علشان تنجز ومعظمهم مدفعش لأنه تبع الاخوان والناس معاها طبعا موافقات زى موافقات السيد حسان اللى ممدوح مضاها وبيتهرب منها فلما اتحرقت وحدة شيبة طبعا الدفاتر اتحرقت ومبقاش مع الناس الا الموافقات الموقعة والمختومة بخاتم شعار الجمهورية فممدوح طبعا لازم يدور على حل فقدم مذكرة للمحافظ زى اللى قدمها فى السيد حسان حبيبه قبل مايغدر بيه يتهم المواطنين بالتزوير وان المستندات اللى تقدموا بيها مزورة والمحافظ حولها للنيابة من غير مايعترف ان الخطأ عند ممدوح وان الناس دى خدت موافقات بالمخالفة ودفعت ودفعت مرافق وان اختام الدولة مش مزورة وان فيه كارثة هتحصل بسبب قراره ليتفادى الصدام مع بلدياته ولا سلقى بالا لصدامه مع الناس .. الحق يامحلب قبل فوات الأوان


مرزوق وحيدا فى معركة ردّ شرف

.



ربيت وهننت وكبرت وقلتوا من يوم ماعينتكم وراك ياكبير ودفعت مرتبات ومكافآت ومجاملات ودرجات فى التفوق واعفاءات من الاشتراكات فى الرحلات ودخول الزورار والأهل ومشاريبهم على حسابى واهو اليوم اللى محتاجكم فيه جه قولوا لى هحلها ازاى ولا انتم خريجى زراعه زى ما الناس بتقول ومالكوش فى القانون فشمر مجلس خيبتها الاستشارى عن ساعديه وقال وحلف بوالديه ان الحل موجود ومتقلقش ياريس دا احنا مستشارينك ولينا الحلاوة لو خرجناك منها زى منخرج السم من العجين مش بس الشعره ففرح المهيطل مرزوق وقال ميه ميه فقال كبير المستشارين احنا نجيب الواد بازوكا ونديله ال 250 الف جنيه ويقول انا اخدتهم عمولة لأنى جبت العرض من نادى الزمالك وكده كده احنا قصدى المجلس واخد قرار بمنحه عمولة فردّ مستشار ثانى محذرا ان القرار ده لو ظهر هيتحبس هوه واللى معاه وبعدين اللاعب ممكن بل بالتأكيد هيرفض ماهو مش هيشيلها عن المجلس ويلبسها هوه فسأله مرزوق ايه الحل قال نخفى القرار وندفع الفلوس ويادار مدخلك شرّ فقال له مرزوق كده بكون حرامية رسمى قال له ياعم الناس بتنسى ثم قال مرزوق وانا ادفع ليه وانا مالى فقال له احدهم ماهو لابد من الدفع وانا من رأى من دقن النادى نفتل له قال ازاى قال له هقولك ووطى صوته وقال : نجيب مستثمر ( م الحسينى ) يدفع الفلوس ونديله المحلات وهوه عاوزها ونعمل له مزاد وهمى علشان ياخد فلوسه فقال له مستشار تانى هوه احنا خلصنا من ورطة المحلات اللى ورا علشان نغلط فى اللى قدام واحنا مجبناش موافقة الوزارة على البناء ولا مدة التأجير فقال له مرزوق نخلص الأول من مشكلة الفلوس اللى هتودينى السجن وبعدين هنلاقى حل بعد كده للمحلات حتى لو متحليتش اهو الستثمر عنده القضاء ياخد حقه منه وانتهت الجلسة الى بدء المفاوضات للحصول على الفلوس وتسليمها لبازوكا ليدفعها فى النيابة

.


حدوته مالهش حلّ قصّة تشيب العيال وتخلى الأصلع شعر راسه يطلع وينبت وقصة اول ما تيجى سيرتها تحس بحاجات كتير ولما تقرأ فصولها تلاقى فيها كل حاجه من أول المجدعة والشهامة مرورا بالضحك على الدقون وتقليب الزبون وصولا إلى الدم والبلطجة كما فى روايات كثيره هذا هو أحمد فؤاد أباظة نائب ابوحماد والزقازيق لو حب ونائب أى مكان تقع عينه عليه وبصراحه صوته مسموع قبل الثورة كان وبعد الثورة زى ماهو بيجلجل على فكرة انت ممكن تسميه دولة احمد فؤاد أباظة الشاب الذى تحوّل لأمبراطور وكبير عائلة كانت تتبرأ منه عندما كان لايزال بعيدا عن الصفّ الأول فلما وصل الصف الأول عملوا له مقام وخلوه كبيرهم واصبح المليونير فالملياردير فالمالطى ملياردير ولا حد عرف ليه ولا إزاى ولا جتى القانون قدر يقول له بم وبدل المصنع اصبح عنده مصانع وبدل الشركة شركات وبدل المشروع مشاريع والفدان فداديين ولا حد فاهم ولا حتى حد حاول يفهم وبصراحه محدش كتير يقدر زى ما معظمنا بيخاف من ابورجل مسلوخة وعمره ماشافه والعفريت رغم انه عمره ماطلع لحد بصراحة الرجل عمل له هيبة زى خيبة ابوخليل كده فده اصبح مليونير وده اصبح ولىّ من اولياء الوهم وافتكر زمان لما واحد حبيبى كتب عن فساد التعبئة فى انابيب الغاز بناء على مناقشة تمت فى المجلس المحلى راحت له كتيبة كوماندوز على المكتب لولا ان الله سلم وتوسط له عنده اصدقاء له ومن يوميها محدش يقدر يتكلم غير عن الجزء الحلو فى احمد فؤاد باظة وهو الشهامة والوقوف بجانب المظلوم مهما كانت قوة خصوصه ومش مهم يكونوا من ابوحماد والسناجرة لا بصراحه هوه فى دى وانا اشهد وشهدت له مواقف جدع وجدع أوى لكن ان حد يقدر يهوب ناحية كراسة الحساب ويحاول يجمع أو يطرح أو يقسم أكيد هيشوف النجوم فى عز الضهر وفى الضلمة عادى والغريب ان مبارك غضب عليه فترة لكن مقدرش يستغنى عنه واستردوه وكان وحش بصراحة وحامى حمى الحزب الوطنى فى الشرقية وفى أى محافظة لو استدعوه فيلبى فورا وعشان كده محدش شاف ولا حب يشوف بيعمل ايه وكله عمل مش واخد باله حتى لما أخد ارض الخطارة علشان يزرعها وجرفها والدنيا هاجت الحكومة احالت الأمر لحكومة الصومال وقالت هى اقدر على محاسبة فؤاد اباظة والغريب ان لما الثورة قامت احمد فؤاد مستخباش زى اعضاء مجلس شعب احمد عز اللى لبسوا طرح واستخبوا الا فؤاد فالرجل جه وقام ببناء مدارس اللغات فى الزقازيق ووسعها صحيح على ارض زراعية وبالمخالفة لكن مش هنقف عند الحاجات الهايفة دى ومحدش يقول لى لو واحد غلبان عمل كده كان اتعمل فيه ايه لأنه أكيد كان اتنفخ واتشوى واتخوزق بس ده اى حد اه لكن احمد فؤاد اباظة ؟ اعقلوا وحتى لما الدكتور عزازى خد موقف منه جه الاخوانى حسن النجار واتظبط معاه وجه سعيد فظبط معاه وجه رضا فزبّطه ورصف له الطريق امام المدرسة ومغرفش ليه احمد فؤاد بيتكيف لما الحكومة اللى تعمل له الخدمات رغم انه مثلا تبرع ب50000 الف جنيه لفريق الكورة بتاع نادى الشرقية وكان ممكن يرصف بيهم الطريق لكن كيف عنده ياخد اموال الدولة ببلاش سواء ارض او مشاريع أو حصانة أو أى حاجه واوعدكم هحكى لى حكاية هرم الأموال ومصادرها قريبا
لكن رغم ذلك احمد فؤاد وعلى مسئوليتى هينجح فى أى انتخابات فى ابوخماد لأن بيت الشعب مفتوح على الآخر لأهالى الدائرة ( بيت الشعب ده بيت احمد فؤاد بالسناجره وسماه بيت الشعب على غرار بيت الأمة كده ) وطبعا الفلوس بالكوم والناس غلابة وللأمنة شغل ناس كتير عنده واكلهم عيش من العيش الكتير طبعا اللى واخده منهم بالقانون وشوفوا الصورة دى والمحافظ قاعد انتباه امامه

سيناريوهات مرزوق للهروب ممن ظبطوا الخازوق 

أحمد فؤاد أباظة : حدوتة صنعها الوهم وحكاية كتبتها الفهلوة وقصة نجاح ملفقة ودبلومات فى تفتيح المخ ودكتوراه فى استغلال غباء وجشع وفساد دولة مبارك ولازال اباظة حاضر فى كل مشهد