من يستحق لقب نائب فى الشرقية ؟ اولا الدائرة الأولى ( الزقازيق ) وجوه كرهتها الجماهير ووجوه مسار للسخرية ووجوه بيستهبلوا لامؤاخذه

خلاص الفاس وقعت فى الراس هننتخب مجلس نواب يعنى هننتخب مجلس نواب واللى كنا خايفين منه حصل والرئيس أصر على ان تجرى الانتخابات قبل نهاية السنة وياريته سابنا نفرح بالقناة الجديدة ولا جرناش للقرف ده والايام الهباب اللى هنشوفها والمجلس اللى هيجيله يشده لورا مش للامام هنختار شوية مراهقين ومناجيس وزبالة بالأمر لن معندناش غيرهم والمحترم والنص نص والربع نص مش هيلاقوا مكان الا فى العباسية لو كان عندهم دم والمصيبة اللى قريناها من بدرى انّ المجلس اللى جاى فى ظل ظروف المرشحين المعروضين واللى لسه هيتعرضوا إن المجلس الجاى سلفى بالأغلبية اللى هيحصلوا عليها واى حد عنده كلام تانى يقدم لى دليل واحد عليه او يستنانى لما الانتخابات تتم ويفكرنى باللى قلته أو باللى هيقوله وانا عندى البرهان والدليل والمنطق والحسابات الانتخابية والحكمة اللى عند الناس اللى فاهمة وبتعرف تحسب وتفكر هى اللى بتقول ايه اللى هنشوفه والسواد اللى منتظرنا فى مجلس هو المجلس اللى مفروض ان درة تاج المجالس لو فيه ناس بتفهم وبتقدر لكن قدرنا اننا نرجع لنقطة الصفر كل لما نمشى خطرة النقطة الاولى لما شكلنا مجلس سيطر عليه الاخوان ووراهم السلفيين مش عشان هم اغلبية فى الشارع لكن علشان مرشحى الاغلبية اكثر مما يحتمل المنطق والعقل والنقطة السودة التانية لما بتوع الفلول رجعوا من الثورة التانية غاسلين شرفهم اللى ضاع فى الاولى يعنى ثورة اولى سرقها الاخوان والتانية هيتسبب فى ضياعها الفلول اللى هيقسموا الاصوات ويفتتوها لصالح السلفيين وفى الحالتين مصر اللى بتدفع الثمن هتقولوا ده كلام انشاء وطق حنك هقول لكم موافق اسمعونى وقولوا بعدها على من نطلق الرصاص